ദൂരദർശന്റെ ആദ്യകാല പ്രമുഖ വാർത്താ അവതാരക സരള മഹേശ്വരി (71) അന്തരിച്ചു

ന്യൂ ഡൽഹി: ഇന്ത്യൻ ടെലിവിഷൻ ചരിത്രത്തിലെ ആദ്യകാല വാർത്താ അവതാരകരിൽ ഏറെ ശ്രദ്ധേയയായിരുന്ന സരള മഹേശ്വരി വ്യാഴാഴ്ച ഡൽഹിയിൽ വച്ചാണ് അന്തരിച്ചത്.

1976 മുതൽ 2005 വരെ ദൂരദർശനിൽ വാർത്താ അവതാരകയായി സേവനമനുഷ്ഠിച്ച അവർ, ദൂരദർശന്റെ തുടക്കകാലത്ത് ദിവസവും ചുരുങ്ങിയ മണിക്കൂറുകൾ മാത്രം പ്രക്ഷേപണമുണ്ടായിരുന്ന സമയത്ത് വാർത്തകൾ അവതരിപ്പിച്ചിരുന്നു. 1980-കളിലും 1990-കളിലും ദൂരദർശന്റെ വാർത്തകളുടെ മുഖമായിരുന്നു സരള മഹേശ്വരി.

അവരുടെ കുടുംബ സുഹൃത്തും മുൻ സഹപ്രവർത്തകനുമായ ഷമ്മി നരംഗാണ് മരണവിവരം ആദ്യം പങ്കുവെച്ചത്. എക്സിലും ഇൻസ്റ്റഗ്രാമിലും പോസ്റ്റ് ചെയ്താണ് അദ്ദേഹം ഈ വിഷയം അറിയിച്ചത്. ഇന്ന് വൈകുന്നേരം നിഗംബോധ് ഘാട്ടിൽ സംസ്കാരം നടന്നു.

ദൂരദർശൻ നാഷണലും സരള മഹേശ്വരിയുടെ മരണത്തിൽ അനുശോചനം രേഖപ്പെടുത്തി. മൂന്ന് ദശാബ്ദക്കാലം നീണ്ട കരിയറിൽ ടെലിവിഷൻ വാർത്തകൾ ബ്ലാക്ക് ആൻഡ് വൈറ്റിൽ നിന്ന് വർണ്ണത്തിലേക്ക് മാറുന്നതിന് സാക്ഷിയായ അവതാരക എന്നാണ് ദൂരദർശൻ അവരെ വിശേഷിപ്പിച്ചത്. സൗമ്യമായ ശബ്ദം, കൃത്യമായ ഉച്ചാരണം, മാന്യമായ അവതരണം എന്നിവയിലൂടെ ഇന്ത്യൻ വാർത്താലോകത്ത് പ്രത്യേക സ്ഥാനം നേടിയ അവർ ലാളിത്യവും സംയമനവും വ്യക്തിത്വവും കൊണ്ട് പ്രേക്ഷക ഹൃദയങ്ങളിൽ ഇടംപിടിച്ചു എന്നും ദൂരദർശൻ പ്രസ്താവനയിൽ പറഞ്ഞു.

ഡൽഹി സർവകലാശാലയിൽ നിന്ന് പിഎച്ച്ഡി നേടിയ ശേഷമാണ് സരള മഹേശ്വരി ദൂരദർശനിൽ ചേർന്നത്. അവരുടെ സേവനവും സംഭാവനയും ഇന്ത്യൻ ടെലിവിഷൻ ചരിത്രത്തിൽ എന്നും ഓർമിക്കപ്പെടും.