കുവൈത്ത് എണ്ണക്കപ്പലിന് നേരെ ഇറാന് ഡ്രോണ് ആക്രമണം നടത്തി
ദുബൈ: കുവൈത്തിന്റെ വലിയ എണ്ണക്കപ്പലുകളില് ഒന്നായ അല് സാല്മിക്ക് നേരെ ദുബൈയില് ഇറാൻ ഡ്രോൺ ആക്രമണം നടത്തി .ദുബൈ തുറമുഖത്ത് നങ്കൂരമിട്ട കപ്പല് ഇറാന് ആക്രമിച്ചതായി കുവൈത്ത് പെട്രോളിയം കോർപ്പറേഷന്റെ സ്ഥിതീകരണവും ഉണ്ടായി .
കപ്പലില് ഉണ്ടായിരുന്ന 24 ജീവനക്കാരും സുരക്ഷിതരാണെന്നു കോര്പറേഷന് വ്യക്തമാക്കി.
ആക്രമണത്തില് കപ്പലില് തീപിടിത്തമുണ്ടാവുകയും തുടർന്ന് കപ്പലിനു കേടുപാടുകള് സംഭവിച്ചതായും റിപ്പോര്ട്ടുകളുണ്ട്. പ്രാദേശിക സമയം പുലര്ച്ചെ 12.10ഓടെയാണ് ആക്രമണമുണ്ടായത്.ആക്രമണം നടക്കുമ്പോള് കപ്പലില് നിറയെ അസംസ്കൃത എണ്ണ ശേഖരമുണ്ടായിരുന്നു. എണ്ണച്ചോര്ച്ചയ്ക്ക് സാധ്യതയുണ്ടെന്നു അധികൃതര് മുന്നറിയിപ്പ് നല്കി. തീ നിയന്ത്രണവിധേയമാക്കാനുള്ള ശ്രമങ്ങള് തുടരുന്നു.
പശ്ചിമേഷ്യന് സംഘര്ഷം തുടങ്ങിയ ശേഷം തുടര്ച്ചയായി എണ്ണ കപ്പലുകള്ക്ക് നേരെ ഇറാന് ആക്രമണം തുടരുകയാണ്. ഈ പരമ്പരയിലെ ഏറ്റവും പുതിയതാണ് അല് സാല്മിക്ക് നേരെയുള്ള ആക്രമണം.