ജൂണ് ഒന്നുമുതല് സ്ത്രീകള്ക്ക് സൗജന്യ യാത്ര;3,000 രൂപ സാമ്പത്തിക സഹായം; ജനകീയ പ്രഖ്യാപനങ്ങളുമായി സുവേന്ദു സര്ക്കാര്
കൊൽക്കത്ത: സർക്കാർ ബസുകളിൽ സ്ത്രീകൾക്ക് സൗജന്യ യാത്ര, സ്ത്രീകൾക്ക് പ്രതിമാസം 3,000 രൂപ സാമ്പത്തിക സഹായം അടക്കം ജനകീയ പ്രഖ്യാപനങ്ങളുമായി സുവേന്ദു അധികാരി സർക്കാർ. സുവേന്ദു അധികാരിയുടെ നേതൃത്വത്തിലുള്ള പശ്ചിമ ബംഗാൾ സർക്കാർ അധികാരത്തിലേറി ദിവസങ്ങൾക്കകമാണ് പ്രഖ്യാപനങ്ങൾ. മുഖ്യമന്ത്രിയുടെ അധ്യക്ഷതയിൽ ചേർന്ന സംസ്ഥാന മന്ത്രിസഭ യോഗത്തിലാണ് തീരുമാനം.
അന്നപൂർണ്ണ പദ്ധതി പ്രകാരമാണ് സ്ത്രീകൾക്ക് പ്രതിമാസം 3,000 രൂപ സാമ്പത്തിക സഹായം നൽകുക എന്ന് മന്ത്രി അഗ്നിമിത്ര പോൾ പറഞ്ഞു. ഈ പദ്ധതി പ്രകാരം പശ്ചിമ ബംഗാളിലെ സ്ത്രീകൾക്ക് ജൂൺ 1 മുതൽ എല്ലാ മാസവും 3,000 രൂപ വീതം സാമ്പത്തിക സഹായം ലഭിക്കും. അതേ തീയതി മുതൽ സർക്കാർ ബസുകളിൽ സ്ത്രീകൾക്ക് സൗജന്യമായി യാത്ര അനുവദിക്കുന്നതിനും മന്ത്രിസഭ അംഗീകാരം നൽകിയതായും അവർ കൂട്ടിച്ചേർത്തു.സംസ്ഥാന ജീവനക്കാർക്കും അനുബന്ധ നിയമപരമായ സ്ഥാപനങ്ങൾക്കും വിദ്യാഭ്യാസ സ്ഥാപനങ്ങൾക്കും വേണ്ടി ഏഴാം സംസ്ഥാന ശമ്പള കമ്മീഷൻ രൂപീകരിക്കുന്നതിന് ബിജെപി സർക്കാർ അംഗീകാരം നൽകിയതായും മന്ത്രി പറഞ്ഞു. മതപരമായ വർഗ്ഗീകരണത്തിന്റെ അടിസ്ഥാനത്തിൽ വിവിധ ഗ്രൂപ്പുകൾക്ക് നൽകിവരുന്ന സാമ്പത്തിക സഹായം ജൂൺ മാസം മുതൽ നിർത്തലാക്കാനും സർക്കാർ തീരുമാനിച്ചിട്ടുണ്ട്. കൂടാതെ, സിഎഎ പ്രകാരം പൗരത്വത്തിന് അപേക്ഷിച്ചവർക്കും വോട്ടർ പട്ടികയിൽ പേര് ഉൾപ്പെടുത്തുന്നതിനായി രൂപീകരിച്ച ട്രൈബ്യൂണലുകളിലെ അംഗങ്ങൾക്കും അന്നപൂർണ്ണ പദ്ധതി പ്രകാരമുള്ള ആനുകൂല്യങ്ങൾ ലഭിക്കാൻ അർഹതയുണ്ടായിരിക്കുമെന്നും പോൾ വ്യക്തമാക്കി.
പശ്ചിമ ബംഗാളിലെ പൊതുജനങ്ങൾക്കായി പുതിയ ഇലക്ട്രിക് ബസുകൾ അവതരിപ്പിക്കുമെന്നും അവർ പ്രഖ്യാപിച്ചു. ഓരോ 15 ദിവസം കൂടുമ്പോഴും കാബിനറ്റ് യോഗം ചേരാനും സർക്കാർ തീരുമാനിച്ചിട്ടുണ്ട്.