തിരുവനന്തപുരത്ത് വയോധികയിൽ നിന്ന് സ്വർണം കവർന്ന കേസിൽ നാല് പേർ അറസ്റ്റിൽ

തിരുവനന്തപുരം: തിരുവനന്തപുരം നഗരത്തിൽ, കോർപ്പറേഷൻ ജീവനക്കാരെന്ന് വ്യാജേന വീട്ടിലെത്തി വയോധികയുടെ ഏഴര പവൻ സ്വർണം കവർന്ന സംഭവത്തിൽ രണ്ട് സ്ത്രീകൾ ഉൾപ്പെടെ നാല് പേർ അറസ്റ്റിലായി.

സംഭവം മണക്കാട് മുക്കോലക്കലിലെ അപ്പാർട്ട്മെന്റിലാണ് നടന്നത്. പട്ടാപ്പകൽ വീട് കയറി മോഷണം നടത്തിയത് സ്ത്രീകൾ അടങ്ങുന്ന നാലംഗ സംഘമാണ്. കോർപ്പറേഷൻ ജീവനക്കാരാണെന്ന് തെറ്റിദ്ധരിപ്പിച്ചാണ് ഇവർ എത്തിയത്.

വെള്ളിയാഴ്ച രാവിലെ ഏകദേശം 10.30-11 മണിയോടെയാണ് കവർച്ച നടന്നത്. വയോധികയും മകനും വീട്ടിലുണ്ടായിരുന്നു; മകൻ ജോലിക്ക് പോയ സമയത്താണ് സംഭവം.

പിടിയിലായവർ: റീന, ഷീബ, രാജൻ, ശരത്. ഒരു പ്രതി കൂടി പിടിയിലാക്കാനുണ്ടെന്ന് പൊലീസ് അറിയിച്ചു. പ്രതികളിൽ ചിലർക്ക് വധശ്രമം ഉൾപ്പെടെ മറ്റ് കേസുകളും ഉണ്ടെന്നാണ് വിവരം.

ഫ്ലാറ്റിലെ താഴത്തെ നിലയിൽ വാടകയ്ക്ക് താമസിക്കുന്ന റീനയാണ് കവർച്ച ആസൂത്രണം ചെയ്തത്. ഷീബയ്ക്കുള്ള കടം തീർക്കാനാണ് ഇവർ ഈ പിടിച്ചുപറി നടത്തിയത്.മകൻ പുറത്തുപോയ സമയത്ത് ഹരിതകർമ്മസേന അംഗങ്ങളെന്ന വ്യാജേന ഇവർ വയോധികയെ സമീപിച്ച് മാല കവർന്നു. ഓടിപ്പോകുന്ന സിസിടിവി ദൃശ്യങ്ങൾ പൊലീസിന് പ്രതികളിലേക്കെത്താൻ സഹായിച്ചു.

കവർന്ന സ്വർണത്തിന്റെ ഒരു ഭാഗം പണയപ്പെടുത്തി ഇവർ മൂന്ന് ലക്ഷം രൂപ വാങ്ങിയിരുന്നു. ബാക്കി സ്വർണം കൂടി കണ്ടെടുക്കാനുണ്ടെന്ന് പൊലീസ് പറഞ്ഞു. ആദ്യം റീനയെ പിടികൂടി; മറ്റുള്ളവരെ തമിഴ്നാട്ടിൽ നിന്ന് കസ്റ്റഡിയിലെടുത്തു.