പ്രധാനമന്ത്രിയുടെ ഓഫീസ് നാളെ മുതൽ സേവ തീർത്ഥിൽ പ്രവർത്തനം ആരംഭിക്കും

ന്യൂഡൽഹി: സെൻട്രൽ വിസ്ത പുനർവികസന പദ്ധതിയുടെ ഭാഗമായി നിർമിച്ച പുതിയ സേവ തീർത്ഥ് സമുച്ചയത്തിൽ പ്രധാനമന്ത്രി നരേന്ദ്ര മോദിയുടെ ഓഫീസ് (പിഎംഒ) നാളെ മുതൽ പ്രവർത്തനം ആരംഭിക്കും. 

ഉച്ചയ്ക്ക് നടക്കുന്ന ഔപചാരിക ചടങ്ങിൽ പ്രധാനമന്ത്രി സേവ തീർത്ഥ്, കർതവ്യ ഭവൻ-1, കർതവ്യ ഭവൻ-2 എന്നിവ ഉദ്ഘാടനം ചെയ്യും. സേവ തീർത്ഥ് സമുച്ചയത്തിൽ പ്രധാനമന്ത്രിയുടെ ഓഫീസിനൊപ്പം ദേശീയ സുരക്ഷാ കൗൺസിൽ സെക്രട്ടേറിയറ്റും കാബിനറ്റ് സെക്രട്ടേറിയറ്റും പ്രവർത്തിക്കും. 

സ്വാതന്ത്ര്യാനന്തരം 1947 മുതൽ സൗത്ത് ബ്ലോക്കിലായിരുന്നു പിഎംഒ പ്രവർത്തിച്ചിരുന്നത്. സൗത്ത് ബ്ലോക്കിലെ ഓഫീസുകൾ പൂർണമായി മാറ്റിയ ശേഷം ആ കെട്ടിടം 'ഇന്ത്യ ത്രൂ ദി ഏജസ് മ്യൂസിയം' ആയി പരിവർത്തനം ചെയ്യും.

226,203 ചതുരശ്ര അടി വിസ്തൃതിയുള്ള സേവ തീർത്ഥ് കെട്ടിടം ലാർസൻ & ട്യൂബ്രോയാണ് നിർമിച്ചത്. ഭാരതീയ സംസ്കാരവും പാരമ്പര്യവും ആധുനിക സാങ്കേതികവിദ്യയുമായി സമന്വയിപ്പിച്ചാണ് ആന്തരിക ഘടന രൂപകൽപ്പന ചെയ്തിരിക്കുന്നത്. മന്ത്രിസഭാ യോഗങ്ങൾക്കായി പ്രത്യേകം രൂപകൽപ്പന ചെയ്ത ഹാളും ഇവിടെ സജ്ജമാക്കിയിട്ടുണ്ട്.

പൊതുസേവനത്തിന്റെ കേന്ദ്രമായും ദേശീയ മുൻഗണനകൾ നിർണയിക്കുന്ന വേദിയായും പ്രധാനമന്ത്രിയുടെ ഓഫീസിനെ ഉയർത്തിക്കാട്ടുന്നതിന്റെ പ്രതീകമായാണ് 'സേവ തീർത്ഥ്' എന്ന പേര് നൽകിയത്.

സമുച്ചയത്തിനടുത്തുതന്നെ പ്രധാനമന്ത്രിയുടെ പുതിയ ഔദ്യോഗിക വസതിയുടെ നിർമാണവും പുരോഗമിക്കുകയാണ്. നിർമാണം പൂർത്തിയാകുന്നതോടെ പ്രധാനമന്ത്രി നിലവിലെ വസതിയായ 7, ലോക് കല്യാൺ മാർഗിൽ നിന്ന് പുതിയ വസതിയിലേക്ക് താമസം മാറും. 

ഈ മാറ്റം രാജ്യത്തിന്റെ ഭരണനിർവഹണ വ്യവസ്ഥയിലെ നിർണായകവും പരിവർത്തനാത്മകവുമായ ഘട്ടമായി കണക്കാക്കപ്പെടുന്നു.