ഇത് യുദ്ധത്തിന്റെ അവസാനമല്ല ;യുദ്ധം അവസാനിപ്പിക്കാന് ഇറാന് മുന്നോട്ടുവെച്ച 10 നിര്ദേശങ്ങള്
ടെഹ്റാൻ: അമേരിക്കയുമായി രണ്ടാഴ്ചത്തെ വെടിനിർത്തലിന് സമ്മതിച്ചതിനെത്തുടർന്ന്, വെടിവയ്പ് നിർത്താൻ ഇറാന്റെ പരമോന്നത നേതാവ് മുജ്തബ ഖമേനി എല്ലാ സൈനിക യൂണിറ്റുകൾക്കും നിർദ്ദേശം നൽകി .എന്നാൽ, ഇതോടൊപ്പം തന്നെ ഇത് യുദ്ധത്തിന്റെ അവസാനമല്ലെന്നും അദ്ദേഹം വ്യക്തമാക്കി.'ഇത് യുദ്ധത്തിന്റെ അവസാനമല്ല, എന്നാൽ എല്ലാ സൈനിക വിഭാഗങ്ങളും പരമോന്നത നേതാവിന്റെ ഉത്തരവ് പാലിച്ച് വെടിനിർത്തണം.'- പ്രസ്താവനയിൽ ഖമേനി പറഞ്ഞു. വെടിനിർത്തൽ യുദ്ധത്തിന്റെ അവസാനമല്ലെന്നും യുഎസോ ഇസ്രയേലോ ഏതെങ്കിലും തരത്തിൽ ഇതിനെതിരായി പ്രവർത്തിച്ചാൽ തങ്ങളുടെ കൈകൾ ട്രിഗറിൽ തന്നെയാണെന്നും ഇറാൻ മുന്നറിയിപ്പ് നൽകി. 'ഇത് യുദ്ധത്തിന്റെ അന്ത്യത്തെ സൂചിപ്പിക്കുന്നില്ലെന്ന് ഊന്നിപ്പറയുന്നു. ഞങ്ങളുടെ കൈകൾ ട്രിഗറിൽ തന്നെ തുടരുന്നു, ശത്രുവിന്റെ ഭാഗത്തുനിന്ന് ചെറിയൊരു തെറ്റ് സംഭവിച്ചാൽ പോലും അതിനെ പൂർണ്ണ ശക്തിയോടെ നേരിടും.'- വെടിനിർത്തൽ പ്രഖ്യാപനത്തിന് പിന്നാലെ ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ പുറത്തിറക്കിയ പ്രസ്താവനയിൽ പറയുന്നു. 'യുദ്ധത്തിന്റെ മിക്കവാറും എല്ലാ ലക്ഷ്യങ്ങളും കൈവരിച്ചുവെന്നും നിങ്ങളുടെ ധീരരായ മക്കൾ ശത്രുവിനെ ചരിത്രപരമായ നിസ്സഹായതയിലേക്കും ശാശ്വതമായ പരാജയത്തിലേക്കും എത്തിച്ചുവെന്നുമുള്ള ശുഭവാർത്ത ഇപ്പോൾ ഞങ്ങൾ ഇറാന്റെ മഹത്തായ രാഷ്ട്രത്തിന് നൽകുന്നു.'- ഇറാനിലെ ജനങ്ങളുടെ ത്യാഗത്തിന് നന്ദി പറഞ്ഞുകൊണ്ട് ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ പറഞ്ഞു.
ഇറാൻ മുന്നോട്ടുവെച്ച 10 നിർദേശങ്ങൾ
ഇറാൻ സായുധ സേനയുമായി ഏകോപിപ്പിച്ച് ഹോർമുസ് കടലിടുക്കിലൂടെ നിയന്ത്രിത ഗതാഗതം.
'ആക്സിസ് ഓഫ് റെസിസ്റ്റൻസിലെ' എല്ലാ ഘടകങ്ങൾക്കും എതിരായ യുദ്ധം അവസാനിപ്പിക്കേണ്ടതിന്റെ ആവശ്യകത.
മേഖലയിലെ എല്ലാ താവളങ്ങളിൽ നിന്നും സ്ഥാനങ്ങളിൽ നിന്നും യുഎസ് സേനയെ പിൻവലിക്കുക.
അംഗീകരിച്ചിട്ടുള്ള പ്രോട്ടോക്കോൾ അനുസരിച്ച് ഇറാന്റെ ആധിപത്യം ഉറപ്പുനൽകുന്ന സുരക്ഷിത ട്രാൻസിറ്റ് പ്രോട്ടോക്കോൾ ഹോർമുസ് കടലിടുക്കിൽ സ്ഥാപിക്കുക.
കണക്കാക്കിയ പ്രകാരം ഇറാന് ഉണ്ടായ നാശനഷ്ടങ്ങൾ പൂർണ്ണമായി നൽകുക.
എല്ലാ പ്രാഥമിക, അനുബന്ധ ഉപരോധങ്ങളും ബോർഡ് ഓഫ് ഗവർണേഴ്സിന്റെയും സെക്യൂരിറ്റി കൗൺസിലിന്റെയും പ്രമേയങ്ങളും നീക്കം ചെയ്യുക.
വിദേശത്തുള്ള ഇറാന്റെ തടഞ്ഞുവെച്ച എല്ലാ ആസ്തികളും വസ്തുവകകളും വിട്ടുനൽകുക.
ഈ ഇനങ്ങളെല്ലാം യുഎൻ സുരക്ഷാ കൗൺസിലിന്റെ നിർബന്ധിത പ്രമേയത്തിലൂടെ അംഗീകരിക്കുക.
10 ഇന പദ്ധതിയിലെ തത്വങ്ങൾ അംഗീകരിക്കുന്ന പക്ഷം യുദ്ധം അവസാനിപ്പിക്കാൻ തയ്യാറാകുമെന്നും ഇറാൻ വ്യക്തമാക്കി.
