സിബിഎസ്ഇ പാഠ്യപദ്ധതി പരിഷ്കരണത്തിനെതിരെ സ്റ്റാലിന്
ചെന്നൈ: സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) പുറത്തിറക്കിയ പുതിയ പാഠ്യപദ്ധതിക്കെതിരെ തമിഴ്നാട് മുഖ്യമന്ത്രി എം കെ സ്റ്റാലിൻ. ഹിന്ദി മാതൃഭാഷയല്ലാത്ത സംസ്ഥാനങ്ങളിൽ ഹിന്ദി പ്രോത്സാഹിപ്പിക്കാൻ നിഗൂഢമായ ശ്രമം എന്നാണ് എന്നാണ് സ്റ്റാലിന്റെ ആരോപണം. ത്രിഭാഷ ഫോർമുല ഒളിച്ചു കടത്തുന്നു എന്നാണ് സ്റ്റാലിന്റെ വിമർശനം.2020 ലെ ദേശീയ വിദ്യാഭ്യാസ നയവുമായി യോജിപ്പിച്ച് തയ്യാറാക്കിയിട്ടുള്ള പുതിയ ചട്ടക്കൂട് കേവലം ഒരു അക്കാദമിക് മാറ്റമല്ല, മറിച്ച് ഭാഷാപരമായ അടിച്ചേൽപ്പിക്കൽ സംബന്ധിച്ച ആശങ്ക ശക്തിപ്പെടുത്തുന്നതാണ്. രാജ്യത്തിന്റെ ഭാഷാ വൈവിധ്യത്തെ മാറ്റിനിർത്തുകയും ഹിന്ദിക്ക് അനാവശ്യമായ മുൻഗണന നൽകുകയും ചെയ്യുന്ന വിധത്തിലാണ് പരിഷ്കരണം. ബിജെപി നേതൃത്വത്തിലുള്ള എൻഡിഎ സർക്കാർ 'ഇന്ത്യൻ ഭാഷകൾ' പ്രോത്സാഹിപ്പിക്കുന്നതിന്റെ മറവിൽ കേന്ദ്രീകൃത അജണ്ട നടപ്പിലാക്കുകയാണെന്നും സ്റ്റാലിൻ ആരോപിച്ചു.
ദക്ഷിണേന്ത്യൻ സംസ്ഥാനങ്ങളിലെ വിദ്യാർത്ഥികൾക്ക് ഹിന്ദി പഠനം നിർബന്ധമാക്കുന്ന നിലയിലാണ് പരിഷ്കരണം. ഹിന്ദി സംസാരിക്കുന്ന സംസ്ഥാനങ്ങളിലെ വിദ്യാർഥികൾ തമിഴ്, തെലുങ്ക്, കന്നഡ, മലയാളം, ബംഗാളി, മറാത്തി പോലുള്ള ഭാഷകൾ പഠിക്കാൻ നിർബന്ധിതരാകുമോ എന്ന ചോദ്യവും സ്റ്റാലിൻ ഉന്നയിക്കുന്നു. പാഠ്യപദ്ധതി പരിഷ്കരണത്തിൽ ഇത്തരം ധാരാളം അവ്യക്തതകളുണ്ടെന്നും സ്റ്റാലിൻ പറയുന്നു.
