ജെ.സി ഡാനിയല് പുരസ്കാരം നടി ശാരദക്ക്
Sarada bags JC Daniel Award for lifetime contribution to Malayalam cinema
തിരുവനന്തപുരം: സംസ്ഥാന സര്ക്കാരിന്റെ പരമോന്നത ചലച്ചിത്ര പുരസ്കാരമായ ജെ.സി ഡാനിയല് പുരസ്കാരം നടി ശാരദക്ക്.
മലയാള സിനിമക്കുള്ള സമഗ്രസംഭാവനക്കാണ് പുരസ്കാരം. പുരസ്കാരത്തിന് നടി ശാരദയെ തെരഞ്ഞെടുത്തതായി സാംസ്കാരിക വകുപ്പ് മന്ത്രി സജി ചെറിയാന് വാര്ത്താക്കുറിപ്പില് അറിയിച്ചു.
സംസ്ഥാന സര്ക്കാരിന്റെ പരമോന്നത ചലച്ചിത്ര പുരസ്കാരമാണ് അഞ്ച് ലക്ഷം രൂപയും പ്രശസ്തിപത്രവും ശില്പ്പവും അടങ്ങുന്നതാണ് അവാര്ഡ്. പുരസ്കാരം ജനുവരി 25ന് തിരുവനന്തപുരം നിശാഗന്ധിയില് നടക്കുന്ന കേരള സംസ്ഥാന ചലച്ചിത്ര അവാര്ഡ് സമര്പ്പണച്ചടങ്ങില് മുഖ്യമന്ത്രി പിണറായി വിജയന് സമ്മാനിക്കും.
2017ലെ ജെ.സി ഡാനിയേല് അവാര്ഡ് ജേതാവ് ശ്രീകുമാരന് തമ്പി ചെയര്പേഴ്സണും നടി ഉര്വശി, സംവിധായകന് ബാലു കിരിയത്ത് എന്നിവര് അംഗങ്ങളും ചലച്ചിത്ര അക്കാദമി സെക്രട്ടറി സി. അജോയ് മെമ്പര് സെക്രട്ടറിയുമായ സമിതിയാണ് പുരസ്കാര ജേതാവിനെ തെരഞ്ഞെടുത്തത്.
കേരള സര്ക്കാരിന്റെ പരമോന്നത ചലച്ചിത്രബഹുമതി ലഭിക്കുന്ന 32ാമത്തെ ചലച്ചിത്രപ്രതിഭയാണ് 80കാരിയായ ശാരദ.
