ശബരിമല സ്വർണക്കൊള്ള കേസ്: രമേശ് ചെന്നിത്തല എസ്ഐടിക്ക് മൊഴി നൽകി

തിരുവനന്തപുരം: വിവാദമായ ശബരിമല സ്വർണക്കൊള്ള കേസ് അന്വേഷിക്കുന്ന പ്രത്യേക അന്വേഷണ സംഘത്തിന് (എസ്ഐടി) കോൺഗ്രസ് നേതാവ് രമേശ് ചെന്നിത്തല മൊഴി നൽകി.

ശബരിമലയിലെ സ്വർണ മോഷ്ടാക്കേസുമായി ബന്ധപ്പെട്ട് തനിക്ക് ലഭിച്ച വിവരങ്ങൾ എസ്ഐടിയോട് വെളിപ്പെടുത്തിയതായി ചെന്നിത്തല മാധ്യമങ്ങളോട് പറഞ്ഞു. മോഷണത്തിന് പിന്നിൽ രാജ്യാന്തര പുരാവസ്തു കള്ളക്കടത്ത് സംഘവുമായുള്ള ബന്ധം സംബന്ധിച്ച വിശദാംശങ്ങളാണ് അദ്ദേഹം പങ്കുവെച്ചത്.

നേരത്തെ, ലഭിച്ച വിവരങ്ങൾ ഉൾപ്പെടുത്തി ഒരു കത്ത് എസ്ഐടി മേധാവിക്ക് നൽകിയിരുന്നു. ആ കത്തിന്റെ അടിസ്ഥാനത്തിലാണ് ഇപ്പോൾ മൊഴി രേഖപ്പെടുത്തിയത്. തനിക്ക് ലഭിച്ച മുഴുവൻ വിവരങ്ങളും അന്വേഷണ സംഘത്തിന് കൈമാറിയെന്നും അദ്ദേഹം അറിയിച്ചു. ഒരു പൊതുപ്രവർത്തകൻ എന്ന നിലയിൽ ലഭിച്ച വിവരങ്ങൾ മാത്രമാണ് നൽകിയത്; അത് തെളിവുകളല്ല. ഇനി ആ വിവരങ്ങൾ കൂടുതൽ അന്വേഷിച്ച് സത്യാവസ്ഥ കണ്ടെത്തേണ്ട ഉത്തരവാദിത്തം അന്വേഷണ സംഘത്തിനാണെന്നും ചെന്നിത്തല വ്യക്തമാക്കി.

പൊതുപ്രവർത്തകനെന്ന നിലയിൽ ലഭിച്ച വിവരങ്ങൾ അധികാരികളെ അറിയിക്കേണ്ടത് തന്റെ കടമയാണെന്ന് അദ്ദേഹം പറഞ്ഞു. മുൻ ആഭ്യന്തര മന്ത്രി എന്ന നിലയിലുള്ള ഉത്തരവാദിത്തവും ഇതിൽ ഉൾപ്പെടുന്നു. തനിക്ക് വിവരങ്ങൾ നൽകിയ വ്യവസായിയെ വിളിച്ചുവരുത്തി മൊഴിയെടുക്കണോ എന്ന് തീരുമാനിക്കേണ്ടത് അന്വേഷണ ഉദ്യോഗസ്ഥരാണെന്നും രമേശ് ചെന്നിത്തല കൂട്ടിച്ചേർത്തു.