സിപിഎമ്മിൽ ടേം നിയമം: ഉറപ്പുള്ള സീറ്റുകളിൽ ബാധകം, മറ്റിടങ്ങളിൽ ഇളവ് സാധ്യത

തിരുവനന്തപുരം: സിപിഎമ്മിന്റെ തുടർച്ചയായ രണ്ട് തവണ മത്സരിച്ചാൽ മൂന്നാം തവണ ഒഴിവാക്കണമെന്ന ടേം വ്യവസ്ഥ പൂർണമായി ഉപേക്ഷിച്ചിട്ടില്ല. എന്നാൽ ഇത് കർശന നിർബന്ധമല്ല; അന്തിമ തീരുമാനം സംസ്ഥാന നേതൃത്വത്തിന്റേതായിരിക്കും.

പാർട്ടി ശക്തമായി കരുതുന്ന 'ഉറച്ച സീറ്റുക'ളിൽ ടേം നിയമം ബാധകമാകും. സിറ്റിങ് എംഎൽഎയെ നിർത്തിയാൽ മണ്ഡലം നിലനിർത്താൻ കഴിയുമെന്ന് ഉറപ്പുണ്ടെങ്കിൽ മാത്രം ഇളവ് നൽകി അദ്ദേഹത്തെ/അവരെ മത്സരിപ്പിക്കാം. പകരക്കാരന് അത്രയും ശക്തി ഇല്ലെന്ന് വിലയിരുത്തിയാൽ സിറ്റിങ് എംഎൽഎയ്ക്ക് മൂന്നാം അവസരം നൽകാനുള്ള ശുപാർശ സംസ്ഥാന സെക്രട്ടേറിയറ്റിന് നൽകണമെന്നാണ് നിർദേശം.

കെ.കെ ശൈലജ (മട്ടന്നൂർ), സ്പീക്കർ എ.എൻ ഷംസീർ (തലശ്ശേരി) തുടങ്ങിയവർ രണ്ട് ടേം പൂർത്തിയാക്കിയവരായതിനാൽ കണ്ണൂർ ജില്ലാ പട്ടികയിൽ ഇവർ ഉൾപ്പെട്ടിട്ടില്ല. എന്നാൽ ശൈലജയുടെ കാര്യം സംസ്ഥാന സെക്രട്ടേറിയറ്റ് തലത്തിൽ തീരുമാനിക്കും. ഷംസീറിന്റെ കാര്യത്തിലും അനുകൂല തീരുമാനത്തിന് സാധ്യതയുണ്ട്.

ഇതേസമയം, രണ്ട് ടേം പിന്നിട്ട മുഖ്യമന്ത്രി പിണറായി വിജയന്റെ ധർമടം സീറ്റ് സംബന്ധിച്ച് ജില്ലാ യോഗത്തിൽ ചർച്ചയേ ഉണ്ടായില്ല.

ജില്ലകളിൽനിന്നുള്ള സ്ഥാനാർഥി പട്ടികകൾ നാളെ ചേരുന്ന സംസ്ഥാന സെക്രട്ടേറിയറ്റ് പരിശോധിക്കും. വിജയസാധ്യത കണക്കിലെടുത്ത് ആവശ്യമെങ്കിൽ മാറ്റങ്ങൾ നിർദേശിക്കും. അതിന്റെ അടിസ്ഥാനത്തിൽ ജില്ലാ നേതൃത്വം വീണ്ടും യോഗം ചേർന്ന് പുതുക്കിയ പട്ടിക സമർപ്പിക്കും. തുടർന്ന് സംസ്ഥാന സെക്രട്ടേറിയറ്റും കമ്മിറ്റി യോഗങ്ങളും ചേർന്ന് അന്തിമ തീരുമാനമെടുക്കും. അതിന് മുമ്പ് കേന്ദ്ര കമ്മിറ്റിയുടെ അംഗീകാരവും വേണ്ടിവരും.