ജുഡീഷ്യറിയിലെ അഴിമതി പാഠഭാഗം: എൻസിഇആർടി പുസ്തകം സുപ്രീംകോടതി നിരോധിച്ചു

ന്യൂഡൽഹി: എട്ടാം ക്ലാസ് സാമൂഹികശാസ്ത്ര പാഠപുസ്തകത്തിൽ 'ജുഡീഷ്യറിയിലെ അഴിമതി' എന്ന ഭാഗം ഉൾപ്പെടുത്തിയതിനെ തുടർന്ന് സുപ്രീംകോടതി കടുത്ത നടപടി സ്വീകരിച്ചു.

പുസ്തകത്തിന്റെ പ്രസിദ്ധീകരണം, പുനഃപ്രസിദ്ധീകരണം, ഡിജിറ്റൽ വിതരണം എന്നിവയ്ക്ക് സമ്പൂർണ നിരോധനം ഏർപ്പെടുത്തി. എല്ലാ ഭൗതിക പകർപ്പുകളും പിടിച്ചെടുക്കാനും ഡിജിറ്റൽ ഉള്ളടക്കങ്ങൾ പൂർണമായി പിൻവലിക്കാനും കോടതി ഉത്തരവിട്ടു.

ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച്, ജുഡീഷ്യറിയെ അപകീർത്തിപ്പെടുത്താനുള്ള ആസൂത്രിതവും ആഴത്തിൽ വേരൂന്നിയതുമായ ഗൂഢാലോചനയാണിതെന്ന് വിലയിരുത്തി. ഇത്തരം നീക്കങ്ങൾ ജുഡീഷ്യറിയുടെ അന്തസ്സിനെ തകർക്കുന്നതും ക്രിമിനൽ കോടതിലക്ഷ്യത്തിന്റെ പരിധിയിൽ വരുന്നതുമാണെന്ന് കോടതി നിരീക്ഷിച്ചു. "തലകൾ ഉരുളണം" എന്ന് ചീഫ് ജസ്റ്റിസ് പറഞ്ഞു; ഉത്തരവാദികളെ കണ്ടെത്തി ശിക്ഷിക്കേണ്ടത് തന്റെ കടമയാണെന്നും അദ്ദേഹം വ്യക്തമാക്കി.

കൂടുതൽ ആഴത്തിലുള്ള അന്വേഷണം നടത്തുമെന്നും വിഷയം വെറുതെ വിടില്ലെന്നും കോടതി അറിയിച്ചു. എൻസിഇആർടി ഡയറക്ടറോടും സ്കൂൾ വിദ്യാഭ്യാസ സെക്രട്ടറിയോടും കാരണം കാണിക്കൽ നോട്ടീസ് അയച്ചു; നിർദേശങ്ങൾ ലംഘിച്ചാൽ ഗുരുതര നടപടികൾ ഉണ്ടാകുമെന്ന് മുന്നറിയിപ്പ് നൽകി.

കേന്ദ്ര-സംസ്ഥാന സർക്കാരുകൾ ഉത്തരവ് ഉടൻ നടപ്പാക്കണമെന്ന് കോടതി ആവശ്യപ്പെട്ടു. എൻസിഇആർടിയുടെ നേരത്തെയുള്ള വിശദീകരണത്തിൽ ക്ഷമാപണം പോലും ഉണ്ടായിരുന്നില്ലെന്ന് ചൂണ്ടിക്കാട്ടി കോടതി അതൃപ്തി രേഖപ്പെടുത്തി. വിദ്യാഭ്യാസ മന്ത്രാലയത്തിന് വേണ്ടി സോളിസിറ്റർ ജനറൽ തുഷാർ മേത്ത നിരുപാധിക ക്ഷമാപണം നടത്തി.

കേസ് മാർച്ച് 11ന് വീണ്ടും പരിഗണിക്കാൻ കോടതി മാറ്റിവെച്ചു.