മന്ത്രി കെ.ബി. ഗണേഷ് കുമാറിനെതിരെ ഡിജിപിക്ക് പരാതി

കൊല്ലം: ഗതാഗത മന്ത്രി കെ.ബി. ഗണേഷ് കുമാറിനെതിരെ ഡയറക്ടർ ജനറൽ ഓഫ് പോലീസിന് (ഡിജിപി) പരാതി നൽകി. കെഎസ്‌യു സംസ്ഥാന വൈസ് പ്രസിഡന്റ് യദു കൃഷ്ണനാണ് പരാതിക്കാരൻ.

പരാതിയിൽ പറയുന്നത്, മന്ത്രിയെ മറ്റൊരു സ്ത്രീയുമായി അനുവദനീയമല്ലാത്ത സാഹചര്യത്തിൽ ഭാര്യ ബിന്ദു മേനോൻ കണ്ടുവെന്നാണ്. ഇതിനെ തുടർന്നുണ്ടായ തർക്കത്തിലും മർദനത്തിലും ഭാര്യ സഹായത്തിനായി 112-ലേക്ക് വിളിച്ച് വിവരം അറിയിച്ചിട്ടും പൊലീസ് യാതൊരു നടപടിയും സ്വീകരിച്ചില്ലെന്നും ആരോപണമുണ്ട്. മന്ത്രിയുടെ ഭാര്യ തന്നെ സംഭവം നേരിട്ട് കണ്ടതായും, തുടർന്ന് 112ലേക്ക് വിളിച്ച് അറിയിച്ചതായും പരാതിയിൽ വ്യക്തമാക്കുന്നു. എന്നാൽ, തുടർ നടപടികൾ ഒന്നും ഉണ്ടായില്ലെന്നാണ് ആരോപണം. സംഭവത്തിൽ സമഗ്രമായ അന്വേഷണം നടത്തണമെന്നാണ് യദു കൃഷ്ണന്റെ പ്രധാന ആവശ്യം.

മന്ത്രി ഗണേഷ് കുമാറും അദ്ദേഹത്തിന്റെ സ്റ്റാഫും ചേർന്ന് ഭാര്യ ബിന്ദുവിനെ ആക്രമിച്ചുവെന്നും പരാതിയിൽ പറയുന്നു. മന്ത്രിക്കും ബന്ധപ്പെട്ട സ്റ്റാഫിനുമെതിരെ കേസ് രജിസ്റ്റർ ചെയ്ത് അന്വേഷണം നടത്തണമെന്ന് യദു കൃഷ്ണൻ ഡിജിപിക്ക് നൽകിയ പരാതിയിൽ ആവശ്യപ്പെട്ടിട്ടുണ്ട്.

ഭാര്യ ബിന്ദു മേനോൻ ഗണേഷ് കുമാറിനെതിരെ ഗുരുതര ആരോപണങ്ങൾ ഉന്നയിച്ചതിന് പിന്നാലെയാണ് കെഎസ്‌യു നേതാവിന്റെ പരാതി രംഗത്തെത്തിയത്. വാളകത്തെ വീട്ടിൽ മന്ത്രിയെ അനുവദനീയമല്ലാത്ത സാഹചര്യത്തിൽ കണ്ടുവെന്നും, ഇതിന്റെ തെളിവുകൾ തന്റെ കൈവശമുണ്ടെന്നും ബിന്ദു മേനോൻ മുമ്പ് പ്രതികരിച്ചിരുന്നു.