കുഞ്ഞ് മാലാഖ ആലിന്റെ അന്ത്യ യാത്ര: ഔദ്യോഗിക ബഹുമതികളോടെ സംസ്കാരം

തിരുവനന്തപുരം: കേരളത്തിലെ ഏറ്റവും പ്രായം കുറഞ്ഞ അവയവദാതാവായ പത്തനംതിട്ട സ്വദേശിനി 10 മാസം പ്രായമുള്ള ആലിൻ ഷെറിന്റെ സംസ്കാരം ഔദ്യോഗിക ബഹുമതികളോടെ നടക്കും. മുഖ്യമന്ത്രി പിണറായി വിജയനാണ് ഇത് അറിയിച്ചത്. നെടുങ്ങാടപ്പള്ളി സെന്റ് തോമസ് പള്ളിയിൽ ഞായറാഴ്ച വൈകീട്ട് 3:30നാണ് സംസ്കാരം നിശ്ചയിച്ചിരിക്കുന്നത്.

രാത്രിയിൽ സിവിൽ ഏവിയേഷൻ ഹെലികോപ്റ്റർ ഉപയോഗിക്കാൻ അനുവാദമില്ലാത്തതിനാൽ അവയവങ്ങൾ റോഡ് മാർഗം കൊണ്ടുവരാനാണ് തീരുമാനമെന്നും മുഖ്യമന്ത്രി വ്യക്തമാക്കി. ആദ്യം കൊച്ചിയിൽ നിന്ന് ഹെലികോപ്റ്റർ വഴി തിരുവനന്തപുരത്തേക്ക് അവയവങ്ങൾ എത്തിക്കാനായിരുന്നു പദ്ധതി.

ആലിനിൽ നിന്ന് സ്വീകരിച്ച അവയവങ്ങൾ നിലവിൽ രണ്ട് കുഞ്ഞുങ്ങൾക്ക് നൽകാൻ കഴിഞ്ഞു. ആ കുഞ്ഞുങ്ങളുടെ ആരോഗ്യനില മെച്ചപ്പെട്ടുവരുന്നതായി ആശുപത്രി അധികൃതർ അറിയിച്ചതായും മുഖ്യമന്ത്രി പറഞ്ഞു.

10 മാസം മാത്രം പ്രായമുള്ള ആലിൻ ഷെറിൻ എബ്രഹാമിന്റെ വിയോഗം ഏറെ വേദനാജനകമാണ്. പ്രിയപ്പെട്ട കുരുന്നിനെ നഷ്ടപ്പെട്ട തീരാനോവിനിടയിലും അവയവദാനത്തിന് മുന്നോട്ടുവന്ന മാതാപിതാക്കളുടെ തീരുമാനം മഹത്തരവും പ്രചോദനാത്മകവുമാണെന്ന് മുഖ്യമന്ത്രി അഭിനന്ദിച്ചു.

ഫെബ്രുവരി 5ന് ഉച്ചയ്ക്ക് 2:30നാണ് പത്തനംതിട്ട മല്ലപ്പള്ളി സ്വദേശികളുടെ മകൾക്ക് റോഡപകടത്തിൽ മസ്തിഷ്ക മരണം സംഭവിച്ചത്. കോട്ടയത്ത് നിന്ന് തിരുവല്ലയിലേക്ക് എം.സി. റോഡ് വഴി കാറിൽ യാത്ര ചെയ്യവേ പള്ളം ബോർമ കവല ജംഗ്ഷന് സമീപം എതിരെ വന്ന മറ്റൊരു കാർ ഇടിച്ചുകയറുകയായിരുന്നു. കുഞ്ഞിന് ഗുരുതരമായി പരിക്കേറ്റു; അമ്മയ്ക്കും മാതാവിന്റെ മാതാപിതാക്കൾക്കും സാരമായ പരിക്കുകൾ സംഭവിച്ചു.

അപകടം നടന്ന ഉടനെ കുഞ്ഞിനെ ചങ്ങനാശ്ശേരി, തിരുവല്ല എന്നിവിടങ്ങളിലെ ആശുപത്രികളിലും പിന്നീട് ഫെബ്രുവരി 7ന് കൊച്ചിയിലെ അമൃത ആശുപത്രിയിലും പ്രവേശിപ്പിച്ചു. ഫെബ്രുവരി 13ന് മസ്തിഷ്ക മരണം സ്ഥിരീകരിക്കുകയും കുടുംബാംഗങ്ങൾ അവയവദാനത്തിന് സമ്മതം അറിയിക്കുകയും ചെയ്തു.