ചോറ്റാനിക്കര മകം തൊഴൽ ;ആരാധനയും സവിശേഷതകളും

ജഗദീശ്വരിയായ ആദിപരാശക്തിയാണ് ചോറ്റാനിക്കര ക്ഷേത്രത്തിലെ മുഖ്യപ്രതിഷ്ഠ. ''ചോറ്റാനിക്കര അമ്മ'' എന്നറിയപ്പെടുന്ന ഭഗവതിയെ സൗമ്യസുന്ദരമായ രൂപത്തിൽ മഹാവിഷ്ണുവിനോടൊപ്പം പ്രതിഷ്ഠിച്ചിരിക്കുന്നു. അതിനാൽ ഇവിടെ ലക്ഷ്മീനാരായണ സങ്കൽപ്പത്തിന് പ്രത്യേക പ്രാധാന്യമുണ്ട്. ഭഗവതിയ്ക്കും മഹാവിഷ്ണുവിനും ഭദ്രകാളിയ്ക്കും തുല്യമായ മഹിമയാണ് ഈ ക്ഷേത്രത്തിൽ കല്പിക്കപ്പെട്ടിരിക്കുന്നത്. അതുകൊണ്ടുതന്നെയാണ് ഇവിടെ പ്രസിദ്ധമായ ''അമ്മേ നാരായണാ, ദേവീ നാരായണാ, ലക്ഷ്മീ നാരായണാ, ഭദ്രേ നാരായണാ'' എന്ന നാമജപം ഉദ്ഭവിച്ചതായി വിശ്വസിക്കു ന്നത്. ഉപദേവനായ ധർമ്മശാസ്താവിനും (അയ്യപ്പൻ) ഈ ക്ഷേത്രത്തിൽ പ്രത്യേക പ്രാധാന്യമുണ്ട്.

ഭഗവതിയുടെ അഞ്ചുഭാവങ്ങൾ

ചോറ്റാനിക്കരയിൽ ഭഗവതിയെ പ്രധാനമായും മൂന്നു പ്രധാനഭാവങ്ങളിലാണ് ആരാധിക്കുന്നത്. അതിനനുസരിച്ച് മൂന്നു രീതിയിലുള്ള അലങ്കാരവും പ്രത്യേക പൂജാക്രമങ്ങളും ഇവിടെ നടപ്പിലാക്കപ്പെടുന്നു. പ്രഭാതത്തിൽ (രാവിലെ ഏഴ് മണിവരെ) വെള്ളവസ്ത്രത്തിൽ പൊതിഞ്ഞ് വിദ്യാസ്വരൂപിണിയായ മഹാസരസ്വതിയായി ആരാധിക്കുന്നു. കൊല്ലൂർ മൂകാംബികാഭാവം ഇവിടെ സ്മരിക്കപ്പെടുന്നു.

ഉച്ചയ്ക്ക് ചുവന്ന വസ്ത്രത്തിൽ മഹാലക്ഷ്മിയായി അലങ്കരിക്കുന്നു. സമൃദ്ധിയും ഐശ്വര്യവും പ്രദാനം ചെയ്യുന്ന ഭാവമാണിത്. വൈകുന്നേരം നീലവസ്ത്രത്തിൽ ദുർഗ്ഗാ പരമേശ്വരിയായി ദർശനമരുളുന്നു. ഇതിനുപുറമെ, ക്ഷേത്രത്തിൽ ശിവസാന്നിധ്യമുള്ളതിനാൽ പാർവതിയായും, കീഴ്ക്കാവിൽ ഉഗ്രമായ ഭദ്രകാളിഭാവത്തിലും ഭഗവതി ആരാധിക്കപ്പെടുന്നു. ഇങ്ങനെ മഹാസരസ്വതി, മഹാലക്ഷ്മി, ദുർഗ്ഗ, പാർവതി, ഭദ്രകാളി എന്നീ അഞ്ചു ഭാവങ്ങളിൽ ഭഗവതിയെ ആരാധിക്കുന്നതിനാൽ ചോറ്റാനിക്കരയമ്മയെ 'രാജരാജേശ്വരീ' അഥവാ 'ആദിപരാശക്തി' ഭാവത്തിലാണ് സങ്കൽപ്പിക്കുന്നത്.

മേൽക്കാവും കീഴ്ക്കാവും

ചോറ്റാനിക്കരയിൽ മേൽക്കാവ്, കീഴ്ക്കാവ് എന്നിങ്ങനെ രണ്ട് ക്ഷേത്രങ്ങളുണ്ട്. മേൽക്കാവാണ് പ്രധാനക്ഷേത്രം. പ്രധാനക്ഷേത്രത്തിന് താഴെയായി സ്ഥിതിചെയ്യുന്നതാണ് കീഴ്ക്കാവ്. ആദിപരാശക്തിയുടെ ഉഗ്രഭാവമായ ഭദ്രകാളിയാണ് കീഴ്ക്കാവിലമ്മ. കീഴ്ക്കാവിൽ പ്രസിദ്ധമായ ''ഗുരുതി പൂജ'' നടത്തുന്നു. ഭക്തജനങ്ങളുടെ പ്രത്യേക വഴിപാടായ ഈ പൂജ ദുഷ്ടശക്തി നിവാരണത്തിനും മാനസികശാന്തിക്കും കാരണമാകുമെന്ന് വിശ്വസിക്കുന്നു. മേൽക്കാവിൽ നിന്ന് അനേകം പടികൾ ഇറങ്ങി കീഴ്ക്കാവിലേക്കെത്താം.

മാനസികരോഗ നിവാരണ കേന്ദ്രം എന്ന വിശ്വാസം

ചോറ്റാനിക്കരയമ്മയുടെ അനുഗ്രഹത്താൽ മാനസിക രോഗങ്ങൾ ശമിക്കുമെന്നാണ് പൊതുവായ വിശ്വാസം. ദുരിതമനുഭവിക്കുന്ന അനേകം ഭക്തർ ഇവിടെ ഭജനം പാർക്കാൻ എത്തുന്നു. 41 ദിവസം ഭക്തിപൂർവ്വം ഭഗവതിയെ ആരാധിച്ചാൽ മഹാരോഗങ്ങൾ പോലും മാറുമെന്ന് വിശ്വാസമുണ്ട്. കുഷ്ഠരോഗം പോലും ഇവിടെ നിന്ന് ഭേദമായതായി ഐതീഹ്യങ്ങൾ പറയുന്നു.

ജീവിതത്തിലെ പ്രതിസന്ധികളിൽ നിന്നും മോചനം ലഭിക്കാനായി ദൂരദേശങ്ങളിൽ നിന്നുള്ള ഭക്തരും ചോറ്റാനിക്കര ക്ഷേത്രത്തിൽ എത്തിച്ചേരുന്നു. പുരാതന കേരളത്തിലെ നൂറ്റെട്ട് ദുർഗ്ഗാക്ഷേത്രങ്ങളിൽ ഉൾപ്പെടുന്ന പ്രധാന ക്ഷേത്രങ്ങളിൽ ഒന്നാണ് ചോറ്റാനിക്കര. ശബരിമല, ഗുരുവായൂർ, ആറ്റുകാൽ, കൊടുങ്ങല്ലൂർ എന്നിവയ്ക്ക് ശേഷം ഏറ്റവും കൂടുതൽ ഭക്തർ ദർശനത്തിനെത്തുന്ന ക്ഷേത്രങ്ങളിലൊന്നായി ചോറ്റാനിക്കര കണക്കാക്കപ്പെടുന്നു.

ബ്രഹ്മാവ്, ശിവൻ, ഗണപതി, ധർമ്മശാസ്താവ്, സുബ്രഹ്മണ്യൻ, ഹനുമാൻ, ജ്യേഷ്ഠാ ഭഗവതി, നാഗദൈവങ്ങൾ, ബ്രഹ്മരക്ഷസ്സ് എന്നിവരാണ് ഉപദേവതകൾ. ഇവരിൽ ധർമ്മശാസ്താവിന് പ്രത്യേക പ്രാധാന്യം ഉണ്ട്. ഭഗവതിയുടെ അംഗരക്ഷകനെന്ന ഭാവത്തിലാണ് ശാസ്താവിനെ ഇവിടെ ആരാധിക്കുന്നത്. അതിനാൽ ശബരിമല തീർത്ഥാടകർ ചോറ്റാനിക്കര സന്ദർശിക്കുന്നത് പതിവാണ്.

ഉത്സവങ്ങളും വിശേഷ ദിവസങ്ങളും

കുംഭമാസത്തിൽ രോഹിണി നാളിൽ കൊടിയേറി ഉത്രം നാളിൽ ആറാട്ടോടെ സമാപിക്കുന്ന ഒമ്പതു ദിവസത്തെ വാർഷിക ഉത്സവം. മകം, പൂരം തൊഴലുകൾ, കന്നിമാസ നവരാത്രിയും വിദ്യാരംഭവും വൃശ്ചികമാസത്തിലെ തൃക്കാർത്തിക, ദീപാവലി, മഹാശിവരാത്രി

ഈ മഹാക്ഷേത്രം കൊച്ചിൻ ദേവസ്വം ബോർഡിന്റെ കീഴിലാണ് പ്രവർത്തിക്കുന്നത്.

ആദിപരാശക്തിയുടെ അനന്തമായ കൃപാസാന്നിധ്യം അനുഭവിക്കാവുന്ന, ഭക്തിയുടെയും ആത്മ വിശ്വാസത്തിന്റെയും ആധ്യാത്മിക ചൈതന്യത്തിന്റെയും കേന്ദ്രമായാണ് ചോറ്റാനിക്കര ക്ഷേത്രം കേരളീയ സംസ്‌കാരത്തിൽ നിലകൊള്ളുന്നത്. ഭക്തജനങ്ങളുടെ വിശ്വാസത്തിനും ആത്മശാന്തിക്കും ആശ്രയസ്ഥാനമായി ഈ ക്ഷേത്രം ഇന്നും തിളങ്ങുന്നു.