പേഴ്സണൽ സ്റ്റാഫ് നിയമനം ;മുസ്ലിം ലീഗിൽ ആഭ്യന്തരകലഹം രൂക്ഷം

മലപ്പുറം: പേഴ്സണൽ സ്റ്റാഫ് നിയമനത്തെച്ചൊല്ലി മുസ്ലിം ലീഗിൽ ആഭ്യന്തരകലഹം രൂക്ഷമാകുന്നു .മന്ത്രിമാർ തങ്ങളുടെ പേഴ്സണൽ സ്റ്റാഫ് നിയമനങ്ങളിൽ പാർട്ടി അംഗീകരിച്ച പ്രത്യേക സമിതിയുടെ നിർദ്ദേശങ്ങൾ അട്ടിമറിച്ചതിനെച്ചൊല്ലി സംഘടനയ്ക്കുള്ളിൽ ആഭ്യന്തര തർക്കങ്ങൾ നിലനിൽക്കുകയാണ് .പാർട്ടി നേതൃത്വത്തെയും താഴെത്തട്ടിലുള്ള സജീവ പ്രവർത്തകരെയും പൂർണ്ണമായി അവഗണിച്ചാണ് മന്ത്രിമാർ തങ്ങളുടെ പേഴ്സണൽ സ്റ്റാഫ് അംഗങ്ങളെ നിയമിച്ചതെന്നാണ് പ്രധാന ആക്ഷേപം.

ഇത് കോഴിക്കോട്, വയനാട്, കാസർകോട് തുടങ്ങിയ വടക്കൻ ജില്ലകളിലെ പാർട്ടി നേതാക്കൾക്കും അണികൾക്കുമിടയിൽ വലിയ രീതിയിലുള്ള പ്രതിഷേധത്തിനും അതൃപ്തിക്കും കാരണമായിട്ടുണ്ട്.പാർട്ടി അനുമതി നൽകിയ പ്രത്യേക സമിതി തയ്യാറാക്കിയ 30 ഉദ്യോഗാർത്ഥികളുടെ പട്ടികയിൽ നിന്നും 15 പേഴ്സണൽ സ്റ്റാഫ് അംഗങ്ങളെ നിയമിക്കാനാണ് ലീഗ് നേതൃത്വം മന്ത്രിമാർക്ക് നിർദ്ദേശം നൽകിയിരുന്നത്.

എന്നാൽ ഭൂരിഭാഗം മന്ത്രിമാരും ഈ നിർദ്ദേശങ്ങളെല്ലാം മറികടന്ന് തങ്ങൾക്ക് താല്പര്യമുള്ള വ്യക്തികളെ സ്വന്തം നിലയിൽ സ്റ്റാഫിലേക്ക് തിരഞ്ഞെടുക്കുകയായിരുന്നുവെന്ന് പാർട്ടി വൃത്തങ്ങൾ വ്യക്തമാക്കുന്നു.

വർഷങ്ങളായി സംഘടനയ്ക്ക് വേണ്ടി സജീവമായി പ്രവർത്തിക്കുന്ന യോഗ്യരായ പ്രവർത്തകരെ വടക്കൻ ജില്ലകളിൽ നിന്നും ബോധപൂർവ്വം ഒഴിവാക്കിയ മന്ത്രിമാർ, അടുത്തിടെ മാത്രം പാർട്ടിയിലേക്ക് കടന്നുവന്ന വിരമിച്ച ചില സർക്കാർ ഉദ്യോഗസ്ഥർക്കാണ് പേഴ്സണൽ സ്റ്റാഫിൽ വലിയ പദവികൾ നൽകിയതെന്ന് ഒരു മുതിർന്ന ലീഗ് നേതാവ് വെളിപ്പെടുത്തി. ഡെപ്യൂട്ടേഷൻ തസ്തികകളിൽ പാർട്ടി പ്രവർത്തകരെ നിയമിക്കുന്നതിന് ചില സാങ്കേതിക പരിമിതികൾ ഉണ്ടെന്ന് മനസ്സിലാക്കാമെങ്കിലും, തെരഞ്ഞെടുപ്പിന് തൊട്ടുമുമ്പ് മാത്രം പാർട്ടിയിൽ ചേർന്ന വിരമിച്ച ഉദ്യോഗസ്ഥരെ ഏകപക്ഷീയമായി നിയമിച്ചതാണ് അണികളെ ചൊടിപ്പിച്ചത്.

നിയമനങ്ങളിൽ ഭൂരിഭാഗവും തിരുവനന്തപുരം, കൊല്ലം തുടങ്ങിയ തെക്കൻ ജില്ലകളിൽ നിന്നുള്ളവർക്ക് ലഭിച്ചപ്പോൾ കോഴിക്കോട്, വയനാട്, കാസർകോട് എന്നീ ജില്ലകൾ പൂർണ്ണമായി അവഗണിക്കപ്പെട്ടു. കോഴിക്കോട് ജില്ലയിൽ മാത്രം മുസ്ലിം ലീഗിന് ആറ് എംഎൽഎമാർ ഉണ്ടായിരുന്നിട്ടും മന്ത്രിസഭയിൽ ജില്ലയ്ക്ക് പ്രാതിനിധ്യം ലഭിച്ചിരുന്നില്ല. ഈ അവഗണന പേഴ്സണൽ സ്റ്റാഫ് നിയമനങ്ങളിലൂടെയെങ്കിലും പരിഹരിക്കേണ്ടതായിരുന്നുവെന്ന് നേതാക്കൾ ചൂണ്ടിക്കാണിക്കുന്നു. പിഎച്ച്.ഡി ബിരുദവും ബിരുദാനന്തര ബിരുദവുമുള്ള നിരവധി യോഗ്യരായ യുവനേതാക്കളെയാണ് ഈ രീതിയിൽ മാറ്റിനിർത്തിയത്. തങ്ങൾ നൽകിയ മുപ്പതോളം പേരടങ്ങുന്ന യോഗ്യതാ പട്ടികകൾ മന്ത്രിമാർ പാടേ തള്ളിയതായി ഒരു ജില്ലാ ഭാരവാഹി സ്ഥിരീകരിച്ചു.മുസ്ലിം ലീഗ് കോർ കമ്മിറ്റിയുടെ തീരുമാനപ്രകാരമാണ് പേഴ്സണൽ സ്റ്റാഫ് നിയമനത്തിനായി പ്രത്യേക സമിതി രൂപീകരിച്ചിരുന്നത്. ജനറൽ സെക്രട്ടറി പി.എം.എ സലാം, സയ്യിദ് റഷീദ് അലി ശിഹാബ് തങ്ങൾ എന്നിവരുടെ നേതൃത്വത്തിലുള്ള സമിതി അയ്യായിരത്തോളം അപേക്ഷകൾ വിശദമായി പരിശോധിച്ച ശേഷമാണ് ജില്ലാ അടിസ്ഥാനത്തിൽ പട്ടിക തയ്യാറാക്കിയത്. നിയമസഭയിലോ മന്ത്രിസഭയിലോ പ്രാതിനിധ്യം ലഭിക്കാത്ത ജില്ലകൾക്ക് തുല്യമായ പ്രാതിനിധ്യം ഉറപ്പാക്കുക എന്നതായിരുന്നു ഈ സമിതിയുടെ ലക്ഷ്യം. എന്നാൽ സമിതി നിർദ്ദേശിച്ച വ്യക്തികളെ തങ്ങൾക്ക് മുൻപരിചയമില്ലെന്ന വാദമുയർത്തി മന്ത്രിമാർ തുടക്കം മുതൽ തന്നെ ഈ സംവിധാനത്തോട് വിയോജിപ്പ് പ്രകടിപ്പിച്ചിരുന്നു. മന്ത്രിമാരുടെ ഈ ഏകപക്ഷീയമായ നീക്കം ലീഗിന്റെ ഉയർന്ന നേതൃത്വത്തിലും വലിയ അസ്വസ്ഥതകൾക്ക് കാരണമായിട്ടുണ്ട്.